भारत सरकारच्या महसूल गुप्तचर संचालनालयाने (Directorate of Revenue Intelligence – DRI) एक मोठी कारवाई करत ‘ऑपरेशन डीप मॅनिफेस्ट’ अंतर्गत तब्बल ३९ कंटेनर्समध्ये असलेला सुमारे १,११५ मेट्रिक टन पाकिस्तानी माल जप्त केला आहे. या मालाची किंमत सुमारे ₹९ कोटी इतकी असून तो थेट पाकिस्तानमधून न आणता दुबईमार्गे भारतात पाठवण्यात आला होता. या प्रकरणी एकाला अटक करण्यात आली आहे.
पाकिस्तानी मालावर बंदी असूनही दुबईमार्गे आयात
पाहलगाम येथे झालेल्या दहशतवादी हल्ल्यानंतर भारत सरकारने २ मे २०२५ पासून पाकिस्तानमधून थेट किंवा अप्रत्यक्षपणे (दुसऱ्या देशामार्गे) होणाऱ्या आयातीवर संपूर्ण बंदी घातली आहे. यापूर्वी अशा मालावर २०० टक्के सीमा शुल्क आकारले जात होते. मात्र, बंदीनंतरही काही व्यापारी मालाच्या मूळ देशाची माहिती चुकीची देऊन आणि शिपिंग कागदपत्रे बदलून माल आयात करत होते.
न्हावा शेवा बंदरावर पकडलेली पाकिस्तानी खजूर
या कारवाईदरम्यान दोन स्वतंत्र प्रकरणांमध्ये उन्हवा शेवा (Nhava Sheva) बंदरावर डीआरआयने शुष्क खजूर (dry dates) असलेली कंटेनर जप्त केली. या मालाचे मूळ दुबई असल्याचे घोषित करण्यात आले होते, परंतु तपासाअंती तो पाकिस्तानातून आला असल्याचे निष्पन्न झाले. हा माल कराची बंदरातून दुबईच्या जबेल अली बंदरावर नेण्यात आला होता आणि तेथून दुसऱ्या कंटेनरमार्फत भारतात पाठवण्यात आला.
आर्थिक व्यवहारातून पाकिस्तानशी थेट संबंध
तपासादरम्यान आढळले की या व्यवहारांमध्ये पाकिस्तानी आणि युएई नागरिकांचा समावेश होता. त्यांनी मालाच्या मूळ देशाची माहिती लपवण्यासाठी गुंतागुंतीचे व्यवहार आखले होते. या व्यवहारात पाकिस्तानी कंपन्यांसोबत आर्थिक व्यवहाराचे धागेदोरेही सापडले असून यामुळे बेकायदेशीर आर्थिक प्रवाहाबाबत गंभीर चिंता व्यक्त करण्यात आली आहे.
डीआरआयचा सतर्क आणि ठोस वावर
‘ऑपरेशन सिंदूर’सह सध्याच्या वाढलेल्या सुरक्षेच्या पार्श्वभूमीवर डीआरआयने संशयित मालावर लक्ष ठेवत गुप्त माहिती आणि डेटा विश्लेषणाच्या आधारे ही मोठी कारवाई केली.
या कारवाईमुळे पाकिस्तानातून तस्करी करून भारतात येणाऱ्या मालाच्या प्रवाहावर मोठा आळा बसला आहे.
राष्ट्रीय सुरक्षेसाठी वचनबद्धता
‘ऑपरेशन डीप मॅनिफेस्ट’मुळे भारताच्या राष्ट्रीय आणि आर्थिक सुरक्षेच्या दृष्टीने महत्त्वाचे पाऊल उचलण्यात आले आहे. सरकारच्या धोरणांचे पालन करणे, सीमा शुल्क आणि अन्य कायद्यांची अंमलबजावणी करणे, तसेच व्यापार मार्गांचा गैरवापर टाळणे यासाठी डीआरआय सातत्याने प्रयत्नशील आहे.
PIB Delhi द्वारा प्रसिद्धी दि. २६ जून २०२५, संध्या. ६:१९ वाजता
